好多人都會話,地板裝完又響,擺個波上去又發現唔平⋯⋯
打釘嘅地板安裝效果同水泥地台有好大關係,新做嘅水泥地台,都係師傅人手盪平,需知道,最後都唔係水平嘅平整度,就算曾經有客人自己用自流平,都因為開水泥技術比例問題,導致最後地台都係唔平嘅。
1. 地台水氣
我地安裝打釘地板前,加釘木底板(或者防水底板,呢個另文再探討)喺水泥地台表面,新盪好嘅水泥地台,我地一般都建議返由盪好一天計起比留14天乾燥。其間師傅可以繼續鏟灰油油或做其他工作。水泥表面一日就乾好,可以喺上面行走活動。因為香港比較潮濕,特別係夏天雨季嘅時候,空氣濕度常常都去到90%以上,如果水泥無乾好就裝地板,水泥持續散出嘅水氣就會谷喺地板下面,常見就係彈底板,底板鬆左高起,再撐起表面地板,引致地板谷起,踩落有聲或者覺得彈彈下咁;更甚者會濕到地板都睇到深色黑左嘅水漬。
2. 熱漲冷縮
當然除左呢個情況,仲有水泥地台做好後都有熱漲冷縮,如咁啱底板口釘鬆起,都會引致地板響或彈彈下嘅情況,咁通常地板安裝可預備嘅就係用返螺旋紋嘅釘,咁樣有幫助底板釘緊一啲。
3. 地台唔平
如果客戶好在意地板安裝後嘅平整度,歸根究底,都係水泥地台嘅平整問題。地板安裝係貼住個地台做,地板唔會自己斜咗;咁如果地台比較唔平,又唔想重新盪過,我地建議客戶考慮用返6分厚嘅地板,可以補救到一啲,令到地台無咁斜,地板安裝平整度就可以提高。
地板裝好唔平,絕對唔係地板嘅問題,大家裝修嘅時候都可以關心一下水泥地台嘅情況,盪好還是唔盪好?有啲情況好似做鎖扣地板咁,如果地面本身鋪左磚,比起水泥地台都更平,可以表面直接鋪地板;當然打釘嘅平扣地板同鎖扣地板都各有好處,具體要點樣選擇就要個別討論了。
*文章版權屬Verdee Bamboo Flooring所有,轉載請標明出處
Commentaires